الناس بالناس

عايزين نطور من أنفسنا
ننمي مهاراتنا، ونكون أحسن في أخلاقنا 
وتعاملاتنا، شغلنا و هواياتنا، #بس_كيف؟!
كلنا عندنا رغبة في التطور 
و البحث عن الاحسن
بس قليل إلى بيسال كيف؟! 
وأقل الي بيجرب الف طريقة و طريق 
عشان يعرف كيف، كورسات، دورات 
إستشارات، مختصين،  وغيرا كتير
من الطرق المعروفة، ومبنية علي تركيبة
وشخصية المتعلم، يعني في الي بيستوعب
بالتلقين تحكي لي وتفهمو #الحنك_شنو، 
أو الي بيحب يعلم نفسوا ف #توري_الشارع 
بي وين والباقي علي،الي بيستفيد من خبرة
الي حوالي و بيشوف الامثلة الحيه، ووووو، 
بس لو أنت بتتعلم و تستفيد وتعلم غيرك
حيحصل شنو؟! 
#الفكرة
أنا بحب مجال، درستو و عرفت قواعدو 
الاساسية، فالي بيجي بعدي يدرس نفس
المجال حاشرح ليهو هو #ماشي_وين،
ماكفاية الدراسة لازم دعامات فحاقرأ 
كورسات و ادخل دورات، لما أفهم اكتر
حاعمل كورس او دورة أنقل بيها خبرتي
البسيطة للمبتدئين، صح مااي شخص ممكن
يعمل كدا بس حسب خبرتك حتعمل علاقات
و تستفيد منها بالاضافة لخبرتك، وهكذا،
#ببساطة كل ماتطلع خطوه مد ايدك للوراك
قوليهو هنا في مكان، أنا حاساعدك، وقتها
حتلقي تلقائيآ أنك بتساعد نفسك و بتحسن
لغيرك وحتلاقي الف مين يساعدك
#تخيل لو كل شخص بيقدر ساعد 
شخص واحد " أن شاء الله واحد بس " 
كيف ممكن يتغير "مش المجتمع" العالم.

فواصل

إنطلق، عانق الحياه بسعادة
وأمل، ولو علي الحافة
لا تكتفي بمنتصف الطريق
ولا أنصاف الممكن، 
تحدي ما تعتقده المستحيل
وتعلم من كل شي فن البقاء...
بحب و رضا وشكرٍ لنعم الله
#الحمد_لله
⤵⤵
#حيـــاه

أسعد الله صباحكم

إنطلق...
أكتشف قدراتك...
تفائل، سيجدك الخير
و تحوز مبتغاك 💜
#أسعد_الله_صباحكم

#حياه

دراما

المستشفي، مفروض انو مكان للعلاج،

يعني الناس الي فيهو تعبانين، عيانين،
حيلهم ماشايلهم، يعني فهم الصف و الدور دا
شنو؟! 😒 " خلاص ماتمشي مستشفي براك
سوق معاك زول يقيف ليك في الصف " 
دي #حليناها 
#اتعرفنا في الصف و جينا لصف الدكتور
يلا حركت انا تعبانه لو سمحت ادخل قبلك
" نعم 😨 بالجد انتي تعبانه؟!  انا ماقادرة
أعبر " #صبرني_يارب " " 
#دخلت وقابلت و جينا نودع بعض " معارف 
وكدا من كم ساعة 😀" ماف اي شي بيخليك
تقارني بين روشتتي و رشتتك، ابدا ابدا 
صح نحنا دخلنا لنفس الدكتور وقد يكون
متخصص بس ما تخصص مرض واحد
#اخر_حاجة الناس الي جاية تجامل وتكفر
حكايات " #مثل_هذا_الحدث " ماف داعي 
ليها، لانو نفسيات ساي حانتكس من سيرة
الادوية و المضاعفات، وانواع العلاجات و غيرو
#الحمد_لله
#يارب_اشفي
#حياه

علاقات (3)

اخوانا المخطوبين او الي تم إعلان خطوبتهم 
ومانعرفش ايه ظروفهم و الملابسات الي
حاصلة ليهم او معاهم، بس كنا معجبين بظاهر
علاقتهم و حكمنا عليهم كمان، مع اننا ماعارفين
ظروفهم ولا افكارهم، بس لما توصل انوا علاقة
ذي دي او ذي ماالناس شافتها تنهيها عشان
سبب ذي دا " تجهيزات ومظاهر ووو " لايمكن 
هو الدنيا حصل فيها شنو 😨؟!  لا و تواصلي
عادي؟!  دا الي ماعادي... 
#الفهم،  ماكل اتنين مع بعض لي بعض
ما كل الناس جاده في علاقاتها مهما طالت.
ما كل الناس بتفتش عن الحب في ناس همها
دبلة وبيت وقسيمة و فسح .
ماف حد بيموت من الحب او الخيانه او 
التجربة الصعبة " في الي بيقوم اقوي ".
الحب ما بيتفشتش بيجي براهو بس انت
خلي صدرك رحب واخلاقك عاليه. 
ما تستغرب في ناس قلوبها حجر و وشوشها
بريئة لكن #الطيبات_للطيبين
#فلان، انت الي مفروض تنبسط و تعمل حفلة
كمان، لانو ربنا نجاك، و ربنا يصبر علان الي لبس
مكانك، بس مااظن تفرق معاهو ورقة و في 
جيبو و مرتب اضافي وربنا يقدرو
#بس_خلاص، انا تاني ببارك وانا ساكته 
وحاابطل ظرافة، وما بسال من زوووول

#حياه

علاقات (2)

علاقات (2)

متذكرين صاحبه بت أخت خاله جارتنا الي
غيرت العريس في يومين " ولا كلمة 💪 " ،
كانت معانا في نفس الجامعة صح ماكنا 
قريبين من بعض بس نحنا بنعرفا و بنحبها
عديل 💜 علشان هي أجمل وارق بنوته و الاهم
تصرفاتا، ماذي بعض البنات الي بتشوفهم هنا 
وهناك، وضحك و مياعة و كانت مميزة بعلاقة
مبهرانا " هي وفلان " أحلى عصافير في الكون
واعين وناضجين " مبالغة 😍 " ماليهم في 
حركات الشفع و النقط نقط،  بس حلوين 
وجادين، ياااخ نحنا بندعي ربنا يحفظهم من
العين كل مانشوفهم " لكن شكلها رشقت 😢"
#المهم  لحدي ما جات السنه الاخيرة و حبيناهم
أكتر لما اعلنو خطوبتهم

#انا_حاضره_لحدي_هنا 😁
#للحديث_بقية

#حياه

علاقات (1)

#علاقات(1)
صاحبه بت أخت خاله جارتنا " ماتركزو في العلاقة نحنا بنعرفا من بعيد 😀 " عزمتنا
لعرسا أنا وصحبتي الظريفة الي مابفوتها شي
،نحنا طالعين مشوار اصلا قلنا نمشي عليهم
ماظريفة الحركة هي قدرتنا وماقصرت
فغشينا، قلنا نبارك ليها و نبقي طالعين
اول مادخلنا سالنا من العروس " طبعا حسب
التوقيت في الافراح بتكون بتجهز و بتطلع
في الوقت بدل الضايع بعد الناس تتعب 😒 "
مامشكلة المهم نبارك ونلحق مشوارنا مشينا و
ماقصرنا يلا أول ماشفتها طبعا بووس و سلامات " علي خفيف يعني قلنا مانضرر المكياج 💆 "، و بما اني مطولة منها سالتها من اخبارا و وقلت ليها فرحت ليك وربنا يهنيك
إنت و " فلان "، كانوا الكهرباء قطعت الغرفة
كلها صمتت و بقوا مركزين معاي، وصحبتي
تكحكح و تقرص فيني، وانا مافهمت اي شي
ولسا مبتسمة كاني ماعملت شي " لكن جد انا
ماعملت شي 🙅 ".
#الفهم طلع اسمو ما فلان،  فلان دا  قلبو " اي
راسا  علي عقب " قبل يومين من العرس بس
" اي  يومين " علشان ماحيعمل ليها العرس
والحفلات ذي ماعايزة ماعشان هو بخيل لا
ابدا قال ملتزم قال ، #وبعدين القصة معروفة مغترب جاهز وراجع طوالي " جاي في السريع
" #انتو_جادين؟! جداد شديد
#ناس العقد جو يباركوا لكن شنو ، بعد افوق
من الصدمة وأرجع بتم ليكم قصة فلان
#قصة_حب
#حياه

ذكريات

الذكريات التي نستطيع تشاركهــا
تبـقي ابداَ فينا حيه،
فلنحرص علي مشاركــة الفــرح
لكي يتـكاثر ويـهدينا سعـــادة
ولو مكرره
فنحن بحاجتها دائما...

#حيـــاه

فواصل

عندما أقول " إفعل ماتريد "
لا تعتقد أنني أعطيك حريه
إنما انذوى بحريتي عنك
والآن " أنت حر " إفهمها كيف تشاء

#حياه

فواصل

دعني اراه بعينيك
وأنت قربي...
ما أجمل الجمال عندما تشير
اليه أناملك وترمقة نظراتك الحانيه
فا أتأملك أنا و تراني فيك

#حياه

سامح

سامح، بتعرف تسامح؟!
قولي انا زعلان منك عشان كدا،
انا مابحب كدا، تاني ماتعمل كدا،
عاقبني لو الموضوع خطير،
بس علشان نفسك ماتعاقب نفسك،
ماترفع ضغطك و تزهج روحك ساي
ما تتضايق وتضايق الي بحبوك بسببي
ياخ سامحني، ماشرط تفتح صفحة جديدة
معاي، سامح عشان تختم الصفحة،
وتنساني لو حابي،
#التسامح؛ راحة بال و نقاء من نوع تاني.
#إحساس إنك ماشايل هم وراضي عن نفسك
عن حياتك وتصرفاتك..
ما تدفع ضرائب بدل الناس، صح في ناس
مابتحس ولا بهمها لكن إنت مالك ومالهم،
خليك طيب و متفهم عشان نفسك،
بعدين اذا أنا قاصد ازعلك بالله مش
عيب عليك تزعل " شينه في حقك عديل ".
بعدين إنت دا تزعلني لي؟!  عشان شنو؟!
أكيد في سبب او لحظة غضب
ولو نحنا إخوان او حتي أعداء او ماف بينا
سابق معرفة، في الاخر نحنا بشر، بنغلط
و معليش او آسف دي ما نبذ،
دا فن فن، أخلاق حميدة، و دين
#جمعة_سعيدة_سمحة_عليكم

#حياه

أحبهم

#نحبهم...
أولئك الذين يخجلنا صمتهم ولو موتنا
لاننا ندري انه أقوى من كل كلماتنا
واعزارنا الواهية...
أولئك الذين يستحقون ان ننحني
لتراب لامسته أقدامهم بعزه وكرامة
وخشيت ابصارنا إدراكه...
أولئك الذين افتخروا بنا رغم ضعفنا
عندما قالوا إنهم منا والينا وخزلتهم
أفكارنا التي تدهورت بإتجاه عولمه
غسلت ملامحنا...
#نحبهم واقولها خجلا ومقصرا
#أحبهم

#حياه

تالت شارع

أنا كنت هنـاك...
تـالت شارع
جمب الجامع
بداية الحـِلة
مستيها ذي كل مرة
تطلع بـرا... @):-
فوق الزاوية تخت الحَــلة
أعاين فيها صباحا بدري
و أتمناها نصيبي وقدري
و أرجع جاري البيت طـــوالي
أغير و آجهـز شأن عـم بكري
سيد اللبن الانا صاحبتــو
كل يوم صدفة كنتا بقابلو
و أشيل أنا عنو...
من أول شارع حدي الرابع،
شأن في التالت أدق أنا بابهـم <3

#حياه

حيرتونا

من فترة طويلة قررت اقاطع الصحافة،
وبطلت اقرأ جرائد لانها بترفع ضغطي وقلت
أحافظ علي صحتي واتابع المفيد يعني كاتب
فاهم وواعي وعارف هو بيكتب شنو وعلي
قدر مايقدر بيقول الحقيقة، ومايستخف
بعقولنا، فشنو أشوف ليهو صفحة رسمية و ما
الي ذلك، أما التلفزيون مابقدر عديل بعد
ماكنت مدمنه كرتون واسبيس تون، صح لسا
بتابعهم بس لاحظت أنو النجاح مرتبط بالغباء
والحظ والكسل تصدقوا؟! ، فيها معتقدات
وأفكار بتدمر عقول أطفالنا جد، فقلت علشان
أحافظ علي عقلي او الشوية الفضلت فيهو
أتابع البحبو والمفيد علي اليوتيوب، بس
مرات كدا في زهج بيخليك تقلب في القنوات،
ذي امس كدا قررت اشوفهم من الاول
للاخر و فتحت التلفزيون من الجداد الي انا
فيهو عملت بحث وقعدتا ويلا من واحد وقلت
أنزل تحت، لقيتهم الف وحاجة اتخلعت بس
قلت خير أصلا مابخليهم، شي أفلام وأغاني
وقنوات تخصصية أطفال قرأن وووو العجيب
الناس بقت ماعندها اسامي بتشيل اسم فلم
وتعملو قناه واريتو لو فلم نافع، تعبت
الصراحة قلت أفتح القائمة و أفتح البيعجبني
غلبني والله الأسامي كلها ملفتة وتفتحها
تنصدم بالمحتوى قلت أشوف #القنوات_السودانية
لا تعليق لاني ماحاوقف كتابة للصباح بس
السؤال الي خطر في بالي ونفسي اعرفو
و #جيت_أسألكم انتو المذيعات البنات
والمذيعين الاولاد ديل دارسين اعلام؟!،
#اخر_سؤال؛ معدين البرامج ديل هم معدين
صحي ولا القنوات دي بتشتغلنا؟!
#معليش ؛ طبعا اعتذر جدا للمذيعين
والمذيعات والاذاعة والبرامج والمعدين
الي بجد و شكرا ليكم وربنا يصبركم
و يحفظكم من الضغط العليكم
#حيرتونا
#حياه

فلم هندي

لي ننتظر النهاية السعيدة؟!
في كل القصص التقليدية بتبدأ بمشاكل
وألم وعذاب وفجيعة وفي الاخر خاااالص
يعم السلام " فلم هندي "،
طيب الفلم دا ساعتين قول تلاتة يعني
المختصر المفيد دا لو المخرج ظابط، لكن
حياتنا مالازم ولا بيصح تكون فلم،
صح نحنا هنا علشان نُختبر و نُـمتحن ونصبر
و نعمر بس الحياه ما سوداء كدا،
نحنا الي لابسين نظاره ومسودنها،
في اشخاص بيخافو من السعادة، السهولة،
يعني تلقي الواحد امورو ظابطة، ماشي
يتقدم علي وظيفة يقبلو و امورو تسلك و
الحياه فل، يقوليك أنا قلبي مقبوض ماممكن
بالسهولة دي، ولا الي نازلة طالعة تشكي من
راجلا و أول مايقرر يتعدل و يتعب من زنها
و يستسلم، القيامة تقوم أكيد راقد علي
مصيبة، صح في صعوبات بس ماممكن
كل الحياه حفر و مطبات كدا
#الفكرة
في كل الأمثال الشعبية والغير شعبية،
بيقول ليك الفهم في الرحلة، يعني عيش
حياتك بتفائل وأمل وخليها علي الله،
أسعى وواجه مشاكلك، فكر وركز علي الحلول
وبتتسهل و ماتقفلا علي نفسك
لما ربنا يسهلا عليك
#حياه

وجع

بعض الحب موجع،
أحيانا في محاولاتنا لأسعاد الاخر قد نوذيه
أكثر من الذين يتمنون له الموت،
أولئك الذين نعشقهم حد النهم
ولا نفهمهم جيدا فنصيبهم بخيبة أمل
#حياه

ذكريات

البعض يحمل من الذكريات مايثقل الكاهل
و يقوس الظهر جزعاً،
آو على مافات نجزع؟! 
ام بالآتي نسعد؟! 
أترك مكانا فارغا للغد،
خفف حمولة الالم، فانها ثقيلة و تنمو كالوباء
#حياه

الي يحبك

#من_الاخر
الي يحبك عمرو مابيستغل ضعفك
و حبك لي، الي يحبك بحب فيك حاجات
و بيتقبل حاجات وبيساعدك تكون أحسن؛
ذي مابقولو بحبك علي عيبك...
الي يحبك بيخت مصلحتك قدام
مصلحتو بيفتخر بفخرك و بيحترم ذاتك...
الي يحبك عمرو ماحيخونك ولو مع مين،
مابيئذيك ولو بكلمة، ولا حيتمسكن
لمن يتمكن،
الي يحبك بخاف عليك
و يحب ليك الخير لو كان راضي عنك
ولا متخاصمين، لو كنت من نصيبو
او فرقتكم القسمة والنصيب
بيتذكرك بالخير و لو إتاذي وانجرح بسببك،
الي بنحبهم، والي حبيناهم في يوم،
دائما بيفضلوا ذكري حلوه فحياتنا،
بيكونو اضافة لينا دا لما يكون حب
صادق، من جوا بدون أغراض ومصالح...
الي يحبك عمرو ما بيستقوي عليك،
ولا بالغلط حيذلك، ويخليك صغير
ولو قدام نفسك...
#المفيد
حب وعيش، حب صح، اختار صح،
ماتخلي اي شخص يكون محور حياتك،
خليك أنت المركز،
" وحب لغيرك الي بتحبو لنفسك "
↯↯
#حياه

سودانية

الشعب السوداني دا فن فن، الليله أهلي
وجيرانا قالوا عازمننا عاملين كرامة قلت
خير من بدري بمش عليهم، المهم إنتهت الشغلة
و الملاحات والونسة الدقاق وحركات النسوان
الكبار والنظريات والضواقات، قلت خلاص
النووم بعد دا، رجعتا و العصرية كدا اسمع ليك
لب كش كشلو، طوالي طلعت في المغسلة
جمب الحيطة لقيت طبعا صحبتي الي هي
بت جيرانا عاملة نفس الحركة اتسالمنا
و ماعلينا، المهم طلعت نوبة يلا وين؛
ايوا ماشين ناس جيرانا العندهم الكرامة
لا يمكن نوبة عديل دا انقلاب دا، بعد الكتمات
والربات قلبت نوبة، طبعا انا وصحبتي
ماقصرنا طوالي رجعنا مانحنا معزومين،
بغض النظر عن رأيي ورأى الناس في
المذاهب لكن كان منظر عجيب، الشفع
و النسوان الكبار و الرجال والشباب
والجلاليب والبناطلين برضو، العجبني
كل فئة واخدة جمبه كدا، لكن متفاعلين
بنفس واحد، انتهت الجلسة ووقف واحد
في النص بيدعي ماخلي شي من النجاح
التوفيق للشغل وووو  للعرس وكل زول وهمو،
ظاهر من جره امين وارتفاعا...
#القصة عاداتنا حتي الي مختلفين عليها
فيها شي جميل، ابدا مااتوقعت اني اقول
الجملة دي بس دا الحاصل
#سودانية
↯↯
#حياه

طلع الي جواك

أحيانا بتحتاج تتكلم مع شخص غير موجود،
كانك بتكتب ليهو جواب
وهو معاك أو ساهل إنك تشوفو
لكن فضلت أنو يقراها ويستمتع بيها
في غيابك، مع أنك ماحتشوف رده الفعل
علي وشو، وحتفضل متخيل ردو و حالتو،
كانك بتنتظر الرد، مع اننا مافي زمن جوابات
و بريد بس جد هو شي ممتع،  وساعات مفيد،
انا قررت اكتب رسالة لشخص عزيز،
رسالة بالمعني التقليدي يعني فيها البسملة
والعنوان والتاريخ وفي الاخر امضي أسمى ،
ح أحكي ليهو عن شي جديد
جائز يكون حافظني صم وبيعرف
كل شي عني بس الاحاسيس دائما متجددة؛
دائما ممكن تفاجي الاخر باحساسك تجاهو،
ممكن تحكي ليهو عن شي كان نفسك تقولو
ليهو، نفسك تسمعو منو،
ممكن توصف ليهو قدر كيف هو مهم
بالنسبة ليك،  تذكرو بأشياء نسيتوها او
اندفنت مع الوقت والمشغوليات،
ممكن تقوليهو انا اليوم محتفل بانجازاتك
في حياتي، ممكن و ممكن....
المهم نعبر نقول ولو جزء بسيط من الي جوانا
↯↯
#حياه

كبرى

#كبري ؛الشخص الي في نص اتنين
وماقادر يفهم موقعوا من الاعراب،
كل مايحاول يطلع ويقيف طرف
يلقي نفسو في النص ودا اخف قدر علي الاقل
هو عارف انو في نصهم، عارف انكم بتستغلوا
او بتحاولو لكن المسكين الي فهم إنك ميته
في غرام اهلو وانو لو غاب عنك ثانية
حتمووتي، فطول الوقت شاغل بالو ومالو
و شوية و تبقي محور حياتو، وانو الي حوالي
ماحابين لي الخير من كتر مانصحو
يبعد عنك #ياعيني_علي،
والي بديت تهتم بيها بدون مقدمات و تعمل
عليها قيس،  وحيغمي عليك من الوقفة جمب
بيتهم علشان تشوفها، وانو النوم جفاك
و القلب موجوع بالفراق #ياعيني_عليها،
قولو وصلتو لهدفكم و قطعتوا الكبري
و غظتي حبيبك رجع ولا مارجع ليك
ماموضوعنا، وانت عرفتك علي صاحبتا
و ظبطت امورك وقطعت برضو #الفهم_شنو
حتقطع الكبري علي اساس انك ماحتعدي
منو تاني؟!  مابفكرتو حيحصل ليهم شنو؟!،
ولا ختيتو نفسكم مكانهم!! #حسبي_الله_عليكم
#معلومة دي مااسمعا مفتح ولا خبرة و لا
قادر وبعملا ولا ولا ولا...
دي ازية و ضر #وربنا_يهون
#حياه

العالم الان

قل الحقيقة، النصيحة
وأن كانت قاسية ولو كانت تضرك وتفيدهم
فالأغلبية لا تؤمن بأن الحقيقة حقيقة
لمجرد انه " وعظ بغيرة ليس بنفسه "،
كذلك لايصدقون ان هنالك من يعطي
نصيحة بدون " فخ او فائدة "
#العالم_الان
↯↯
#حياه

أحتاجك يارفيقي

عادي جدا...
في عز الزحمة تحس انك وحيد
علشان الرفقة ما ناس ولا رقم
رفيقك يعني جمبك سندك
نواره طريقك
#أين_أنت_يارفيقي
↯↯
#حياه

عودة

بعد غيــــاب ...
منهـكـــه بالسـعادة ♡❤
فرحة حد الثمــالة
متارجحة وسط الدموع الضاحــكة
↯↯
#حياه

بقاء

دنياك وامورك الشخصية
لا تجعلها ابدا تتعلق ببقائك،
فكلها اقدار مكتوبة نسعي اليها،
نحارب لاجلهتا قد ندركها، نفوتها
او حتي نتخلي عنها...
↯↯
#حياه

شي من القهر

شي من القهر؛
عندما ترى ما يسوء محبيك فتستاء لاجلهم
ولا يسعك إبعاد الأذى عنهم،
ولا ردعهم عن التأثر به
لانه يسوء أحبه لهم...
↯↯
#حياه

لون حياتك

لون حياتك ...
توقع ماهو غير متوقع ...
إحلم بعينين مفتوحتين و انهض لتأخد ماتريد
فالفرص لا تْقًدم بل تنتزع✾
↯↯
#حياه

ماذا لو؟!

ماذا لو تٌْخلُيَتْ عنك
ونحن نعلم أنك تحتاجني !!
وقتها سنكون أنا و أنت ...
سِآقًرَ بّانَنَيَ أحتاجك و أرفض بّقًائك
سِأٌخبّرَنَيَ آنني إْْعتدتك و أ تْقبلُ غيَابّك
سآودعك الماضي و مبتسمة أوَدِْعك
عندما تعتقد آنني ضعيفة, ستتلاشي قًوَتْك
فنحن عاده نَُرى مابنا "دون وعى" للاخرين
↯↯
#حياه

الصبر من عندك يارب

لما تحدد هدفك وكل الناس ضدك،
يبقي تنسي؟! ولا تصبر؟!
لو انت في بداية الطريق، 
علي بعد خطوة، خطوتين او حتي الف
منو الي ممكن يحدد أنك بتقدر تواصل او لا؟!
منو الي من حقو يقرر عنك؟!
إنت ولا المجتمع، الظروف والناس؟!
الي بيحير جد انو الي فاكر نفسو بينصحك
و يخطط لسعادتك، مصدق نفسو وجادي
انو بيفيدك، صحيح هو يمكن خايف عليك
وعايز مصلحتك، بس الي بينفعني ماضروري
ينفعك، والي بيرضيك ماضروري يرضيني
وانت وانا حلوين مع بعض فكمل جميلك
و خليك في حياتي دعم و ماااااااتعصر علي
#الصبر_من_عندك_يارب
#حياه

ضل الضحى

ضل الضحى شاي الفطور
الجبنه والطيب في البخور
ريحة رشاش الطين 
رقراق شمش كوش حبال العنقريب
الونسة حافيها السرور
و كلام دقاق خبرات كتار
لكل يوم مبروك وخير
#حياه

علاقات

بعيداً عن الحب، الصداقة، الاخاء،الزمالة
والقرابة وغيرها من المسميات،
توجد بعض العلاقات التى لا نجد لها تفسير
و لا ماهيه واضحة، أشخاص و أحاسيس
تتغلغل و تتطور دون وعي و إدراك
فكيف توصف و تسمى...
علاقتي بك... جريئة، مغرية كأنها خطيئة،
نعم للخطيئة لذه لا يدركها غير مرتكبيها،
و مهما كانت سيئة في لحظة ما نجد العذر
و المتعة؛ أنها الطبيعة البشرية أو ربما
الجانب المظلم المكتوم بداخلنا و مع ذلك
فهي لحظات ما أن نعود الي الوعي
حتى تختفي ويبدأ الضمير في العمل
و العقاب بالنفاذ...
فإن صُنفت من هذا النوع متي
سأفيق و استعيد رشدي
#علاقات
#حياه

إلهي اليك نلجأ

في قمة الضعف ندعو من لا يخيب الرجاء
ونلوذ بكنفه الذي لا يضام، ونحمده تعالي
و نرجو رضاه،
اليس حريا بنا ان نلجأ اليه في كل حين،
ونحمده علي حال...
اللهم قربنا إليك و املأ قلوبنا بمحبتك
#حياه

علاقات

العلاقة بين اثنين لابد أن تحوى العديد
من التنازلات، على المستوى الفكرى
والثقافى والجسدى، ومع ذلك لكل شى
حد ولكل اناء سعه.التنازلات فى حدود
الحوجة بين المحبين  تنمى العلاقة
وتغرس الثقة لكن ليس لدرجة الزوبان
وطمس الهوية ولا التملك والتجريد
من أبسط الحقوق فى التمسك
بما يميز الاخر, يصعب لشخصين
أن يكونا واحد فلكل منهما كيان
وكينونة مختلفة، ليس بالضرورة مستقلة
عندما يجمعهما إحساس يتشاركانه
#حياه

تأخرت

تأخر الوقت ولم تعد،
عزيزي اين أنت؟! يراودني القلق
و يأبى بصري ان يرتد،
كيف أرى و عتمة المساء
لا يغشاها لون وجودك
#حياه

الحلم الغائب

عَبر الأُفق يغزو السحب ويتسلل ضوئه
حينا دون ان اراءه،
بالقرب من الشاطي؛ على مرمي البصر
امواج تغتسل بنقائيه حينا، وترتفع كانها
تستجديه احيانا اخر،
قمرا يبدو مكتملا لكن وهجا اخر
يشاركه اللحظات ؛
انت وانا شطائنك منذ الازل،
اعلم انك ستمر يوما من هنا
فاجوب الضفة عل قدمك تلامس موضع
غيابي يوما ما،  عل القدر يعجل قدومك،
أخبرتُهم عنك، أجل كل موجهٍ تعلم وصفك
ٱغمض عيناي ويرسم جسدي ملامحك،
حركاتك، ابتسامتك، سكناتك
و عطر وجودك بين الماء،
للبحر  ذاكرة و تاريخ صرت جزءا منها،
كما للعشق جنون يجعلني اتسلل عمق الموج
لأصرخ باسم الحلم الغائب
فتسكتني حتي رئتاي،
تغسل ذاكرتي على انساك،
فاعود غريقا يلفظه رحم الموت حياه
ويسكُنني يقينا انني يوما سألقاك
#حياه

وردة

عزيزي إغرس وردة لاجلي لا تقطفها،
دعني أرعاها لاجلنا،
ارقُبها فصل بعد فصل،
اراقب حرصها علي البقاء،
كرمها في العطاء
وعبق أريجيها يعانق أنفاسنا معاً،
كم هو جميل رحمُ المحبه ينسل الخير
دائما وابدا
#حياه

لما توعد

لما توعد او تقول حاعمل خليك متذكر 

ولو صعب ومشغول ومزحوم أكتبا 

مع قائمة اعمالك،  ياخ ان شاء الله ماتنفذ 

بس اضعف الإيمان ماتنسي، 

مامهم الحاجة الي انا عايزاها 

ولا الي قلت أنك حتعملا 

حتي لو ما عملت، ماعرفت، أجلتا... غيرتا 

بس لسا فاكر، كتيرة دي؟ صعبة؟!  اكيد لا

#القصة

لما شخص يعتمد عليك ويخت في بطنو

 بطيخة صيفي و كل مرة يتنازل دي مشكلة،

  لانو مهما كانت الهفوات بسيطة لما تتراكم

 بتبقي عقدة، 

وماكل الناس تفكيرا واحد 

مهما كانو قراب وروحهم في بعض

#الفكرة

الاهتمام شي بسيط بعيد عن كل التعقيد،

 المجاملة #ياتميم_أفراحنا مامعانا نحنا 

الي كتاب مفتوح لبعض، و الاعتذار مانقص

 بالعكس دا قمة الفهم والزوق،

وعموما نحن حنذكر بعض

#حياه