من القلب

في ناس كدا دائما بيكونو في بالك مع انك مطول منهم, ممكن الفاصل بينكم سنين لكن لسا هم جواك ذي ماهم, بتتذكرم و تتذكر أيامك معاهم و تلاقي نفسك بتضحك علي أشياء مرت بيكم " يالله أيام ".

وتحس بأنها اسعد لحظات حياتك وفي الوقت دا تسال نفسك: هم وين ؟ كيف عاملين ؟ و مع مرور الزمن بتبقي القصة صعبة, مع انك عايز تسمع صوتهم و تطمئن عليهم لكن بتخاف من اللوم من السؤال: وين انتو؟ وماسالتو عننا ؟و حاولنا نتواصل معاكم وخلاص نسيتونا او أصعب من كدا , تخاف انك ترفع سماعة التلفون و يجيك السؤال: منو معاي؟ علي قدر ماهي صعبة و بتوجع علي قدر ما هو شي جميل انو نرجع نجتمع ونسال عن بعض ولو بعد زمن.

 تعالوا نجرب نسال عن ناس لينا منهم زمن ولسا في بالنا نزورهم او نرفع سماعة التلفون او نرسل ليهم رسالة سلام وتحية جميلة و اسمنا في الأخر , ما صعبة حتى لو ذكرناهم نحنا منو بالعكس.

 علشان احلي شي في حياتنا الذكريات الجميلة و اللحظات الي أبدا ما ممكن ترجع بس ممكن تفضل معانا وتتجدد, تعالوا نخلي أيامنا أجمل و نتذكر و نذكر أحبابنا أصحابنا ,أهلنا الناس القرينا معاهم, الناس الي لعبنا معاهم ,الناس الي سافرو ,الناس الي درسونا, الناس الي تعبناهم بشقاوتنا, الناس الي وقفو جمبنا و ساندونا, الناس الي حبونا ومسحوا دموعنا حتى الي اعتبرناهم مرحلة وعدت و فضلوا في ذاكرتنا ,تعالوا نتذكر ونجدد أيامنا الجميلة .