#أصبحنا_واصبح_الملك_لله
لمن تطلعي من البيت الصباح
وانت ماشة علي الدراسة او الشغل
ويلاقيك واحد ويتظارف " ماتكوني ناسية الكمون"
#نصل_متين
لو طلعت امس عشان تصل بدري حتصل متاخر
نفسيات بس من الانتظار والسواق النقناق
و الي بيمينك وشمالك
غيتو الا تشوف ليك مقعد جمب الشباك
وتطلع راسك برا
بالنسبة لاصحاب العربات "نص الدراما فايتاكم"
#الي_معانا
في مكان الدراسة او الشغل
دائما بيكون في صاحب مصانع التلج
الي ما بيفلت منو زول
كانو موظف للدعم المعنوي
الغتيت البيتظارف علي الغاشي والماشي
موجود واساسي " شنو ياحبيبنا"
#معقولة_بس
كل وقت وليهو فهم
لكن بعد منتصف النهار كل شئ بيتغير
يعني الصبر بيظهر لي حد
والي بيفوت بيكون ماشايفك عشان يفوت ليك
فالناس البتتظارف ياريت يقللو النشاط
في الساعة دي " ماوقتك شوف غيرا"
#مامفهومة
في المعاكسات الي بتخليك ماقادر تتصرف
ولا تاخد موقف وتمنع تكرارا
ذي الي بتحسسك بكمية السخف الحاصل
وتطلع رده فعلك هستيريا الضحك
لمن تلقي نفسك فجاه بتضحك
علي حاجة انت مفروض رافضا
" شر البلية مايضحك "
#اخير_سكوتك
لمن تعمل فيها اظرف من البتظارف
وتجي ترد علي و تعمل رباطابي ويغلبك
ولا البنات وردود الروقة والهداوه
كان نسكت احسن
البيتظارف دا لو بينفع معاهو الزوق
كان بقي ظريف " خلي الكلام لي ناسو"
#غير_كدا
في الي مركب عدسات و مابتسمع صوتو
لكن كانو سامعك مركز معاك والمسح شغال
من الاعلي الي الاسفل
دا الي بيجيب الضغط المبكر
وقدر ماتعمل وتقبل وتحدر
تلقاهو مزود الجرعة
" هو الناس حصل ليها شنو"
#يخرب_بيت_ذكائك
في الي بيمنطق ظرافتو
ويحاول يفتح معاك مواضيع
غالبا هو ماعندو فكرة عنها
والي عامل مجامل وهو اصلا ذايد الطين بله
والي بيعمل عليك مهم
وماعندو شغلة غير يحشر نفسو في كل شئ
وغيرو كتتتتتتيييييييير " الصبر من عنك يارب"
#اخيرا
والله ياعالم دي ماظرافة ولا ائ شي
دا نقص وعدم موضوع
ياخ ركز مع نفسك
ولو عجبك شي قول ماشاء الله
ولو ماعجبك قول الحمد لله
طالما انك مضطر تكشف لاي شي
ماتتحشر في كل شي انت ما سوبر انسان
في حاجات لينا وحاجات لغيرنا
ماتعاكس عشان ماتتعكس معاك
وماتتظارف طالما انك ماظريف
ليست هناك تعليقات:
إرسال تعليق