النش

#البداية

مدينة مفتوحة من كل اتجاه و مسافات شاسعة هسي لو عملو ليهم كم طابق كدا وريحونا وريحو نفسهم ماكان احسن ماعلينا كلها خمسة سنوات ربنا يعديها علي خير " الصبر من عندك يارب"

#الدراسة

الناس لازم تنجز خصوصا السمسترات الاولي حترتاح لقدام لانو المعدل دا حاجة كدا عبيطة فالناس تظبطوا من الاول وترتاح من تشغيلة الكيرف و ذاد ونقص " انت و فهمك "

#البراالمة

اول يومين ماتسال من اي حاجة لو ماشي وين وين الميه ميل دي فتشا براك لانك حتلاقي الكفتيريا في زيدان والكلية في الاداره و الحمام في عترة والاستراحة في محمود بعيد " ماقلنا اعتمدو علي نفسكم" 

#المحاضرات

مواسم الهجرة جد الموضوع محتاج مواصلات لكن الرفقة والنقة بتخفف برضو الدوران الي حاصل طبعا التعب بيحتاج كم ساعة كدا في الكفتيريا هرجي وكواريك شعر وغناء قهوة وشاي وونسه دقاق وقد تكون مصحوبة بصداع " علي قلوبنا ذي العسل"

#امتحانات

دي الي كل ماتنتهي يظهر غيرا تقول جارين منها ما بيعدي يوم من غيره امتحان او سيرة الامتحان الجاي صح اننا هنا علشان كدا لكن الناس شوية شوية بتحس انها في البيت وتعيش الحياه ايزززي يعني عندك مشاوير و زيارات للغرف المجاورة ومجاملات ومعارف تمتد بين الاسر " وبعدين معاكم يعني مانرتاح "

#جميل

في احلي من انك تلاقي العلم و الفهم والصحبه والاهل في نفس ذااات الوقت دي النش ذي بيتنا الي بنرتبط بي اهلو اكتر من ناس بيتنا يعني ماقاعد براك واهلك برا ولا في الصالون وانت جوا لكن قايمين نايمين ماكلين شاربين متونسين مفضفضين مذاكرين ممتحنين ماشين جاين سوا " ياخ انا بحبكم عديل"

#ميزة

البلد دي اول ماتدخلا بيكون عندك بطاقة طالب بدوام كامل يعني ممكن تطلع الصباح من قاعة لقاعة لحدي المساء ومطلوب ترجع تذاكر وغيرو شوية وقت وحتلاقي انك انسان بدوام كامل بتذيد واجباتك تجاه نفسك وتجاه عائلتك الجديدة

#هانت_خلاص

اجمل ايام وانت خريج وعارف انها ايام وتغادر علي قدر ما الناس مبسوطة لم تهدا كدا وتفهم القصة ماف دراسة و لامحاضرات ولا ماشين نهاية الاسبوع السوق ولا غرفة ناس فلان و لا شاي في حوش الداخلية و لا سخان حيضرب و لا نظافة الغرفة ولا الفته في الكفتيريا و لا اضرابات واعتصامات ولا الدكتور الثقيل حيلاقيك تاني ومع ذلك حتفضل احلي ايام بس ذي ما كنا شايفين البداية شر لابد منو حنحس انو الفراق شر لابد منو

#وبعدين

كل الرحلة دي في الاخر بتتلخص في كم شخص عاشوها سوا وقررو يكملو و علاقتهم بقت اقوي من مرحلة وعدت بقت ثمرة مراحل جاية بذكريات جميلة مع انو كل الي ممكن يجمعهم قبلها كلمة هنا جامعة الجزيرة بغض النظر عن الاتجاه و الثقافة الانتماءات " ربنا يديم المودة "

#اخيرا

في ناس وذكريات لسا في بالنا ممكن مااتواصلنا ولا جمعتنا الصدف لكن انتو اشخاص لايمكن ان ننساكم سامحونا علي التقصير و اتاكدوا انكم في بالنا و بنشتاق ليكم وبنتمني ليكم كل الخير

#للحديث_بقية

#النش_قصة_لاتنتهي