٠١:٠٨م، س ٢٠١٥/٠٩/٢٦
حقد
حتى ككلمة وبراها بدون وصف مزعجة
فكيف لما تشوفها صفة مجسده في شخص
جد شي مؤلم واكتر لما تكون
في شخص عزيز أو قريب
أو حتى مضطر تتعامل معاهو
" معقول في كدا؟! " واكتر من كدا
لما تلقي شخص بيحقد عليك بدون سبب
بس كدا مع انو عندو أشياء كتيرة
ونعم ربنا منعا عن غيرو
" كيف و مزاج عالي !! "
ماف شي أسمو كدا بس
دي الحكمة الإلهية
يعني في أشياء ملكك وأشياء لغيرك
كويسة أو العكس هو كلو اختبار
نشكر أم نكفر...
لي لازم يعجبك إلي غيرك ؟!
حبو ليهو وربنا يقسموا ليك ويبارك ليهو
#سبق_الإصرار_والترصد
فدا نوع عجيب
يعني لما زول يستخسر فيك ابسط الأشياء
والي هي ملكك أصلا
ويطلع ليك من كل حته بمصيبة
" فن !! "
و يمثل عليك الطيبة
ويتظارف بدون داعي
ويحسسك انو ملاكك الحارس
" هي الناس بتنجلط من شوية !! "
#حقد_طبقي
سبحان الله الجملة دي غالبا
بتطلع من الاتجاه الغلط
بس احلي شئ انو الرضا وراحة البال
ماليهم علاقة بأسعار العملة
" غالبا تفرق عن دائما "
#اعتقاد_شخصي
اعتقد انو الحقد دا مرض ايوا مرض
لانوا ماف منطق يخلي شخص يحقد
حتى ولو علي شخص ظلمك
لأنك في الحالة دي بتظلم نفسك
لأنو المرض دا بياكل الشخص من جوا
وإذا أتمكن ما يطلع إلا بالروح
فسامح جاهد استرد حقوقك
ابكي اشتم صرخ طلع ألجواك
بس أوعي يفترسك المرض
وخلي إيمانك قوي
ليست هناك تعليقات:
إرسال تعليق